Më mirë sasi apo cilësi? Më mirë një ekip kampionësh dhe pak alternativa apo pak lojtarë që bëjnë diferencën mes një organikë të zgjedhur? Debati ka qenë dhe mbetet i hapur, teksa ma afrimin e merkatos thjesht bëhet më i ndezur.
Çdo trajner do të dëshironte në dispozicion një ekip me 20 lojtarë të karaturës botërore, në mënyrë që askush të mos ndiente mungesën e askujt, sidomos në aspektin e rezultateve. Raportet kanë rëndësi thelbësore dhe në këtë kuadër shembulli më i mirë është ai i Masimiliano Alegrit, i cili përveç yjeve, ka mundësinë e zgjedhjeve nga stoli ku ulen lojtarë tepër cilësorë.
Juve – Forca e rezervave juventinë u pa që në javën e parë të Serisë A kur Juvja, në disavantazh të një goli në Veronë, përmbyste gjithçka me Bernardeskin i hedhur në fushë si zëvendësues. Efekti “Berna” u pa edhe ndaj Frozinones, me Juven që në këtë sezon ka grumbulluar dhjetë pikë pasi ka zëvendësuar të paktën një prej titullarëve.
Rivalët – Pozitive, por disi më e ndryshme ecuria e Spaletit. Ndaj Torinos dhe Parmës, Interi humbi katër pikë pas ndryshimeve, por zikaltrit kanë fituar 9 pikë me lojtarë stoli në fushë. Në këtë aspekt Roma ka mbetur në vendnumëro për shkak të ndryshimeve. Milani i Gatuzos, sidomos në javët e para, ka lënë shumë pikë pasi ka qenë në avantazh, por kuqezinjtë janë i vetmi ekip që ka mundur t’i bëjë ballë Juventusit gjatë këtij viti kalendarik.
Teksa Alegri ka grumbulluar 88 pikë në total, banda e Gatuzos, megjithëse në distancë, ka qenë skuadra që ka bërë më mirë nga të gjithë simotrat e Serisë A. 65 pikë për kuqezinjtë, të cilët në muajin e fundit janë përmirësuar në aspektin e rezultateve, e tashmë mbajnë vendin e katërt me një pikë distancë nga Lacio e vendit të pestë. Pikërisht, goli i pësuar në derbi ndaj Interit ndikon në distancën me tri pikë nga vendi i tretë ku ndodhen pikërisht zikaltrit.