Trajneri Pep Guardiola i ka hedhur poshtë kritikat në adresën e tij dhe të skuadrës së Manchester City pas humbjes 2-3 që ekipi kampion i Premier League pësoi në fushën e tij ndaj Crystal Palace. Një humbje befasuese, që la skuadrën e City 4 pikë pas Liverpool, ndërkohë që zgjedhjet e bëra nga trajneri dhe skemat e tij në këtë sfidë prëfunduan nën akuzë.
“Kur unë fitoj, jam një gjeni. Por po ju them që skemat e mia funksionojnë edhe kur humbas e unë mbetem sërish një gjeni”, tha Guardiola, duke u shprehur se të gjithë ata që luajnë japin maksimumin në fushë. “Kemi edhe mungesa, por kjo nuk është justifikim. Ishte thjesht një ditë e keqe dhe kemi shans që të ngrihemi shumë shpejt, pasi pas dy ditësh kemi sfidën me Leicester”, u shpreh më tej trajneri spanjoll.
“Futbolli është i mbushur edhe me surpriza, një e tillë na ndodhi ne. Kjo është një periudhë e vështirë, e mbushur me ndeshje, ndaj të gjithë duhet të jenë gati për të zbritur në fushë kur është e nevojshme. Unë kam besim te kjo skuadër, sezoni është ende i gjatë dhe gjithçka mund të ndodhë deri në fund. 4 pikë diferencë nuk janë shumë”, tha Guardiola.
