Milan ka një garanci: në sulm ka dy lojtarë si Higuain dhe Kutrone. Nuk është çështje nevoje (Gatuzo ka lojtarë të tjerë që mund të luajnë si pyka), por alkimie dhe karakteristikash. Dyshja kompletohet, i ndan mirë hapësirat dhe gjithmonë ka ndërvepruar mirë, por në kohët e fundit po mungon një element thelbësor si goli.
Llogari e hapur – Mes eliminimit nga Liga e Europës dhe sanksioneve nga UEFA, momenti i kuqezinjtë nuk është ndër më të mirët. Nëse Kutrone me shtatë gola sezonale po respekton pritshmëritë, e njëjta sasi golash nuk mjafton për të konfirmuar një bomber me përvojë si argjentinasi. “El Pipita” ka më shumë se një muaj që nuk shënon dhe shterpësia e tij është ndikuar nga skualifikimi dyjavor dhe dëmtimi në shpinë. Kur Milanit i duhej më së shumti, ai nuk ishte, por edhe kur ishte (Olimpiakos e Juve), nuk dha atë që pritej. Ecuria e 31- vjeçarit po shton dyshimet mbi ushtrimin e të drejtës së blerjes së tij, teksa Kutrone dita-ditës rrit vlerën e kartonit të tij.
Shifrat – Në 596 minuta sezonale që kanë luajtur së bashku kanë shënuar tetë gola, 6 italiani dhe vetëm dy ish-juventini. Një gol çdo 65 minuta është një mesatare e mirë, por në momentet kyçe nuk ka rezultuar reale. Një nga arsyet është fakti që kombinojnë shumë, por gabojnë në zgjedhjen e fundit. Dy asiste të 31-vjeçarit për të riun dhe një i këtij të fundit ndaj veteranit janë shumë pak, për dy sulmues që për gjysmën e sezonit iu desh të mbanin peshën e vijës së parë kuqezi. Deri në janar mungojnë edhe tri ndeshje, kohë në të cilën dyshja duhet të ofrojë gola e garanci, përndryshe në sulm do të bëhet e detyrueshme ardhja e një “peshe të rëndë”.
