Modric-Inter nuk ka mbaruar. Pas tentativave të pasuksesshme të verës së kaluar, zikaltrit mund të kthehen në sulm për fituesin e Topit të Artë 2018. Luka Modric, mesfushori i Real Madrid, duket se është shumë afër largimit nga “Los Blancos” pasi ka refuzuar ofertën e fundit për rinovimin e kontratës që i ka bërë klubi spanjoll.
Një “jo” ndaj ofertës së Florentino Perez dhe një propozim në tavolinë nga ana e Inter. Kjo është situata në të cilën duket se ndodhet kroati. Pas lajmit të dhënë nga “Telemadrid”, ka ardhur konfirmimi edhe nga “AS”.
E përditshmja e njohur iberike, në fakt, ka bërë të ditur se Modric ka marrë një ofertë nga Interi: 10 milionë euro në sezon për dy vite, për t’u transferuar më pas në Kinë.
Në këtë pikë, siç ka shkruar “AS”, Real Madrid mund të jetë i detyruar të heqë dorë nga Topi i Artë verën e ardhshme për të mos rrezikuar që ta humbasë atë me kosto zero. Veçanërisht pas këtij sezoni fantastik dhe një kontrate që skadon në qershorin e 2020-ës.
