Ish-portieri i Teutës, Elhan Kastrati, po kalon një formë të mirë në Serinë B me skuadrën e Peskarës, teksa në 2 sfidat e fundit është aktivizuar si titullar. Në një prononcim për “Il Centro”, gardiani 21-vjeçar ka folur për aventurën e tij në Itali, duke treguar disa nga gjërat që i kanë bërë më shumë përshtypje.
Kujtojmë që Kastrati, është pjesë e Shqipërisë U21, madje u grumbullua me Kombëtaren e Kristian Panuçit në miqësoren kundër Uellsit.
“Nuk po mendojmë aspak për kalimin në Serie A, nuk duhet të na kthehet në një fiksim. Palermo është një skuadër e një tjetër kategorie dhe meritojnë të jenë në Serinë A.
Ka shumë ekuilibër midis ekipeve dhe do të na duhet të luftojmë me shumë të tilla. Tifozët? Meritojmë më shumë mbështetje, sinqerisht kam pritur më shumë tifozë në stadium. Jemi në vendet e sipërme të renditjes, kështu që meritojmë më shumë mbështetje nga tifozët“.
