Alexander Gustafsson ka pritur 5 vjet për këtë ditë, për t’u përballur sërish me Jon Jones dhe për t’u hakmarrë për humbjen e pësuar në eventin UFC-165. Më 29 dhjetor do të zhvillohet eventi UFC-232, që ka si duel kryesor sfidën për titullin kampion bote në peshën “light heavyweight” mes Gustafsson dhe Jones. “Kam 5 vjet që stërvitem vetëm për këtë ditë, për këtë duel, për këtë njeri”, tha kampioni suedez i arteve marciale mikse.
“Ka qenë një pritje e gjatë, kam ëndërruar gjithnjë për këtë duel. Jam stërvitur çdo ditë duke menduar këtë duel. Në çdo duel jam stërvitur duke menduar këtë moment dhe tani jam gati. Është ky njeri aty përballë meje që do të më shohë sërish në sy. Unë e di shumë mirë që do ta mposht këtë herë. Është dueli i ëndrrave, që do t’i vërë fund një herë e përgjithnjë emrin të Jon Jones. Jam përgatitur jo për 5, por për 10 raunde”, tha Gustafsson.
