Dy ditë pasi Jose Mourinho u shkarkua nga detyra si trajner i Manchester United, shumë skuadra kanë nisur të mendojnë për shërbimet e tij.
Përveç Interit dhe Real Madridit që tashmë dihet se kanë një interes ndaj portugezit, lajme të reja vijnë edhe përtej oqeanit.
Vetëm pak ditë më parë, Nikolas Burdiso u emërua si drejtor sportiv i Boca Juniors dhe për të treguar se e ka merituar këtë rol në klub, ai ka nisur që të punojë për të siguruar shërbimet e teknikut portugez.
Humbja me River Plate në finalen e Kupës Libertadores bëri që trajneri i skuadrës të paraqiste dorëheqjen dhe drejtuesit po mendojnë për një pasues të denjë.
Nëse Mourinho pranon të marrë drejtimin e Bocës, ai do të ndihmohet nga njëri prej heronjve të tripletës me Interin, duke qenë se Cambiaso mund të bëhet ndihmës i tij në Argjentinë.
Në ditët në vijim pritet që të ketë zhvillime të reja, megjithëse duket i vështirë si operacion për të ndodhur, pasi portugezi mund të synojë një klub të madh në Europë.
