Juventusi dhe Paul Pogba mbajnë lidhje, pavarësisht lamtumirës së dy viteve e gjysmë më parë. Madje, lidhja e tyre duket ende e fortë. Me merkaton e afërt të janarit, megjithatë, edhe thashethemet shtohen. Dhe vetë francezi, kampion bote, nuk bën asgjë për të mos i ushqyer ëndrrat e tifozëve bardhezinj.
Mbrëmë në Paris, mesfushori francez ishte i ftuar nga sponsori teknik në një ngjarje të “Adidas”, së bashku me Paulo Dybala, shokun e skuadrës te Juventusi në sezonin 2015-2016. Fotot e postuara në Instagram nga mesfushori i Juventusit bëjnë që të gjithë tifozët të ëndërrojnë.
Ndërsa Pogba ishte bujtës në Paris me “vëllanë e tij”, pasi e quajti kështu argjentinasin në Instagram, Mino Raiola, sipas “Daily Mail”, do të takohej me Juventusin për të diskutuar mbi disa nga lojtarët e tij. Natyrisht, këtu përfshihet edhe Paul Pogba.
Sipas gazetës britanike, Manchester United nuk do që ta shesë mesfushorin francez, pavarësisht faktit se ditët e fundit ka një zhurmë të madhe. Veçanërisht pas ndeshjes së fundit, të së dielës në “Anfield”, kundër Liverpool-it: 90 minuta në stol. Nuk është hera e parë që kjo ndodh: edhe kundër Fulham, në ndeshjen e luajtur në shtëpi, e fituar 4-1, Pogba qëndroi në stol gjatë gjithë lojës.
Marrëdhënia e tij me Mourinhon (u shkarkua sot) duket se po përkeqësohet gjithnjë e më shumë, edhe pse shitja e tij në janar është shumë e vështirë. Megjithatë, Juventusi mund të provojë. Tifozët bardhezinj shpresojnë ta shohin atë përsëri si duet me Dybala, jo vetëm në foto, në Paris.
