Nëse Milan ndodhet në zonat e larta të klasifikimit kjo nuk është vetëm meritë e klubit, trajnerit dhe merkatos që po kryejnë kuqezinjtë por edhe e portierit 19-vjeçar Gigi Donnarumma. Në ndeshjet e fundit, portieri i Milanit dhe kombëtares “azzurre” po bën një paraqitje të shkëlqyer, duke qenë vendimtar me pritjet e tij.
Në 7 ndeshjet e fundit të Serisë A, skuadra e Milanit ka mbyllur 5 prej tyre pa pësuar gol (ndaj Torino, Bologna, Frosinone, Genoa dhe Napoli), dukë pësuar gol vetëm nga Fiorentina dhe Spal. Një sinjal ky se mbrojtja e kuqezinjve po nis të funksionojë, ashtu sikurse edhe portieri është rikthyer ai i dikurshmi.
Ndaj Napolit, Donnarumma nuk gaboi asnjëherë, duke i pritur të 6 gjuajtjet që përfunduan në kuadratin e tij. Madje ai ndihmoi skuadrën edhe në moment të vështira, duke mos përsëritur gabimet e sezonit të kaluar. Portieri dhe mbrojtja duket se janë kthyer në armën më të fortë të Milanit, që tani pret të shpërthejë edhe në sulm me golat e Piatek.
