Sfida mes Interit dhe kapitenit të saj Mauro Icardi për rinovimin e kontratës po hyn në fazën më interesante. javën e ardhshme do të zhvillohet takimi mes Administratorit të deleguar të klubit zikaltër, Beppe Marotta dhe prokuratores e bashkëshortes së lojtarit, Wanda Nara.
Çështja e vetme është rinovimi i kontratës së sulmuesit 25-vjeçar. Interi është gati t’i ofrojë lojtarit argjentinas 7 milionë euro në sezon, përfshi edhe bonus, një kontratë deri në vitin 2023. Kjo është një kontratë e ngjashme me atë që ka edhe Paolo Dybala me Juventusin.
Oferta e Interit është më e lartë se ajo e bërë para Krishtlindjes (6 milionë euro), ndërkohë që lojtari ka bërë me dije se kërkon 9 milionë euro në sezon. Palët do të diskutojnë për këtë shifër, por synohet që të gjendet një rrugë e mesme, tek 8 milionë euro në sezon.
