Nuk ka paqe për Cristiano Ronaldo-n gjatë kësaj periudhe. Portugezi duhet të përballet me të kaluarën, por ndërkohë Jasmine Lenard, akuzuesja e tij e re, është zhdukur nga rrjetet sociale.
Lajmi është dhënë nga “Mundo Deportivo” dhe ka lidhje me ish-të dashurën e CR7, e cila është bërë një nga më të kërkuarat në internet pas deklaratave të ashpra të bëra kundrejt yllit të Juventus-it, të cilin ajo e ka quajtur psikopat. Tani ajo dhe akuzat e publikuara në rrjetet sociale janë zhdukur dhe kjo manovër mund t’i krijojë shumë probleme.
Në fakt, fshirja e deklaratave nuk mjafton për të ndryshuar opinionin publik. Sipas të përditshmes spanjolle, mbrapa kësaj lëvizjeje ka diçka serioze. Zhdukja mediatike mund të jetë një zgjedhje e menduar mirë.
Ata që mund të kërkojnë Jasmine Lenard në Twitter do të marrin si përgjigje se kjo faqe nuk ekziston. Edhe profili në Instagram është “blinduar”. Hipoteza e ngritur nga “Mundo Deportivo” është se Jasmine mund të jetë këshilluar nga avokatët për ta bërë një gjë të tillë.
E vetmja siguri është se kjo histori nuk mbaron me kaq. Mbetet për t’u kuptuar sesi do të vazhdojë: flluskë sapuni apo gjykatë?
