Impakti i jashtëzakonshëm që Ole Gunnar Solskjaer ka patur në detyrën e trajnerit të Manchester United (9 fitore e 1 barazim) ka befasuar të gjithë, përfshi edhe drejtuesit e klubit (në dhjetor zuri vendin e Mourinho). Ata shohin se kanë në stol një kandidat të fortë për të drejtuar ekipin e “djajve” edhe sezonin tjetër. Gjithsesi, trajneri norvegjez vazhdon të ketë emërimin “i përkohshëm”, që shumë shpejt mund të ndryshojë në “të përhershëm”.
Sipas “The Sun”, sinjalin e parë të rikonfirmimit të Solskjaer në stolin e United edhe sezonin tjetër e jep vendimi që ka marrë klubi. Presidenca e Manchester United i ka besuar detyrën e planifikimit të merkatos për verën e ardhshme, ku Solskjaer do të ketë në dorë një shumë prej 200 milionë stërlinash për ta menaxhuar. Ky lajm, tregon se drejtuesit e klubit besojnë te trajneri norvegjez, që duket se do të ulet në stolin e “Old Trafford” edhe vitin tjetër.
