Arthur Melo do të mungojë për të paktën 3-4 javë për shkak të një problemi muskulor në këmbën e majtë. Ishte vetë klubi i Barcelonës që konfirmoi dëmtimin e mesfushorit brazilian, i cili do të humbasë të paktën 5 ndeshje.
Arthur do të humbasë përballjet me Athletic Bilbao, Sevilla dhe Valladolid për La Liga, ndërsa në Champions League nuk do jetë i gatshëm për sfidën kundër Lyon. Edhe “El Clasico” e dytë për Copa Del Rey do e gjejë atë jashtë fushe, ndërsa në dyshim është edhe përballja e dytë me Real Madridin, më 2 mars për kampionat.
Vendin e tij mund ta zërë Arturo Vidal ose Carles Alena. Një shqetësim më vete për trajnerin Valverde është edhe dëmtimi i Lionel Messi, i cili sot është stërvitur veçmas grupit.
