Trofetë e futbollit nuk e përshkruajnë gjithmonë karrierën e një lojtari, deri në fund, por ndihmojnë në këtë drejtim. Dhe shpesh sheh se dy lojtarë me karriera krejtësisht të kundërta, të kenë të njëjtin numër titujsh. Wojciech Szczesny, portieri i Juventusit, dha një shembull të përshtatshëm për këtë.
I intervistuar nga kanali polak në YouTube, “Foot Truck”, “gardiani” i Juventusit ka bërë një “shaka të kripur”, duke krahasuar bashkëlojtarin e tij bardhezi, Carlo Pinsoglio, me kapitenin legjendë të Romës, Francesco Totti. Kujtojmë se Pinsoglio, pas disa eksperiencash huazimi në skuadra të ndryshme italiane, është tashmë portieri i tretë i “Zonjës së Vjetër”.
“Pinsoglio është një djalë i mirë, e përmirëson atmosferën në dhomën e zhveshjes. Vitin e kaluar ka luajtur 22 minuta, por kaq i kanë mjaftuar atij për të fituar numër të njëjtë titujsh sa Totti…“, – nënvizoi polaku.
Portieri i tretë i Juventusit bëri debutimin e tij në Serie A, majin e kaluar, duke zëvendësuar Buffon në ndeshjen e fundit të sezonit. Një minutazh i reduktuar, por tre trofe të fituar: një titull kampioni, një Kupë Italiane dhe një Superkupë Italiane. Vetëm 22 minuta në fushë. Dhe shumë ngacmime nga kolegu i tij polak…