Ka qenë një nga lojtarët simbol të Real Madrid, klubi me të cilin ka luajtur nga 1999-ta deri në 2015-ën, pasi kishte kaluar me radhë ekipet e moshave. Iker Casillas sot aktivizohet me Porton, por nuk e ka harruar akoma momentin kur u thirr për të luajtur me ekipin e parë.
“Ka qenë 1997-ta dhe ishte fundi i nëntorit, – ka thënë spanjolli për faqen e UEFA-s në internet. – Real-i po luftonte në kampionat, ishte i treti ose i katërti, dhe kishte marrë disa rezultate negative. Ndërsa në Champions gjërat po shkonin mirë”.
“Unë isha në klasë kur erdhi drejtori i institutit dhe më tha: ‘Iker, të vjen keq të dalësh pak?’. Më pas më tha se duhej të merrja një taksi, sepse Real-i sapo i kishte telefonuar mamasë sime për t’i thënë se duhej të shkoja në Norvegji për ndeshjen kundër Rosenborg-ut. U ndjeva sikur kisha fituar lotarinë”.
“Nuk do ta harroj kurrë atë moment, isha vetëm 16 vjeç. Nga bankat e shkollës e pashë veten bashkë me lojtarë si Morientes, Seedorf, Mijatovic, Suker dhe Raul. Ishte diçka magjike. Nuk do ta harroj kurrë”.
