Unai Emery do të ketë vetëm 46 milionë euro për të shpenzuar në merkaton e verës së ardhshme nëse Arsenal-i nuk kualifikohet në Champions League. Londinezët huazuan Denis Suarez nga Barcelona në janar, por Emery dëshiron të ndryshojë rrënjësisht ekipin me të paktën pesë lojtarë të tjerë.
Sipas “The Sun”, Emiliano Martinez, portieri që Arsenal ka huazuar te Reading, pritet të zëvendësojë Petr Cech dhe të bëhet numri 2 i “Topçinjve” sezonin e ardhshëm. Kthimi i 26-vjeçari në “Emirates” do ta lejonte Emery të kursente dhe ta shpenzonte buxhetin e tij diku tjetër.
Më poshtë është lista e yjeve që mund t’i bashkohen Martinez-it me kosto zero.
Mbrojtës
Reparti që e shqetëson më shumë trajnerin e Arsenal-it është mbrojtja Emery kërkon dy mbrojtës krahu dhe një qendërmbrojtës. Shumë emra të mëdhenj do të jenë pa kontratë në verë, duke përfshirë këtu David Luiz, Gary Cahill, Eliaquim Mangala dhe Diego Godin.
Antonio Valencia duket se do të largohet nga Manchester United, ndërsa Alberto Moreno, i cili ka fituar Europa League me Eemery te Sevilla, mund të kthehet nën urdhrat e spanjollit.
Mesfushorë
Adrien Rabiot është mesfushori më i kërkuar në merkato dhe Arsenal do të duhet të mposhtë konkurrencën e Barcelona-s për të siguruar shërbimet e francezit. Gjithashtu, për yllin e PSG-së interesohen edhe Chelsea, Tottenham dhe Juventus.
Hatem Ben Arfa, kontrata e të cilit me Rennes skadon në fund të sezonit, është një tjetër emër me peshë, ashtu si ai i Samir Nasri, ish-ylli i “Topçinjve”.
Sulmues
Olivier Giroud nuk ka shumë hapësira te Chelsea dhe mund të jetë i tunduar nga një kthim te ish-skuadra e tij. Ai ka shënuar 105 gola në 253 ndeshje të luajtura me Arsenal-in.
Një tjetër përforcim i mundshëm është ish-sulmuesi i Manchester City-t dhe Liverpool-it, Mario Balotelli. Italiani ka shkëlqyer në Ligue 1 pasi u largua nga “Anfield” dhe mund të jetë alternativa e duhur për dyshen Aubameyang-Lacazette.
