Juventusi nuk po kalon një moment të mirë dhe pas humbjes 0-3 ndaj Atalantës, që solli eliminimin nga Kupa e Italisë, erdhi edhe barazimi 3-3 ndaj Parmës në Torino. Situata e tensionuar është vënë re edhe dje, në fundin e ndeshjes, ku sulmuesi argjentinas Paulo Dybala ka qenë i nervozuar me trajnerin Max Allegri, që nuk e aktivizoi.
Trajneri kishte vendosur që titullar të ishte Douglas Costa, duke lënë Dybala në stol dhe nuk u aktivizua për shkak të rrethanave të lojës. Fillimisht Allegri aktivizoi Bernardeschi, që zëvendësoi brazilianin dhe në rezultatin 3-1 për Juven trajneri aktivizoi Bentacur, për t’i dhënë më shumë ekuilibër ekipin. Në fund, kur Bernardeschi dëmtohet trajneri Allegri aktivizoi Emre Can dhe jo Dybala.
Ky i fundit, duke parë se nuk kishte më asnjë shans që të luante në këtë sfidë, është larguar i nervozuar nga stoli për në dhomat e zhveshjes ende pa mbaruar ndeshja. Madje duke sharë nëpër dhëmbë. Trajneri Allegri, duke komentuar këtë gjest të sulmuesit të tij, pas ndeshjes tha: “Ndoshta kishte ftohtë dhe u largua më herët”. Krisjet e para sezonale te bardhezinjtë kanë nisur…
