Gareth Bale po kalon nëpër një tjetër kapitull kritik të karrierës së tij. Kjo është përjetuar prej tij edhe më parë. Ky sezon e ka kufizuar mesataren e tij të të luajturit. Uellsiani është aktivizuar në 27 nga 54 lojërat e ekipit, që është 50% e totalit. Dëmtimet e kanë penalizuar edhe këtë edicion. Në janar e nisi vitin e ri i lënduar.
Ky i radhës ishte dëmtimi i tij i 22-të, që kur mbërriti te Real Madridi. Dhe për t’i bërë gjërat më keq, pozita e tij në formacion është kompromentuar, gjithashtu. Uellsiani mbeti jashtë formacionit startues të Solarit kundër Barcelonës, ndeshja më e rëndësishme e të bardhëve deri më sot, por mund ta provojë këtë gjë edhe sot, në derbin kundër Atletico Madridit.
Me trajnerin Zidane, sezonin e kaluar, diçka e ngjashme ka ndodhur me të. Francezi gjeti “karar” me një formacion të suksesshëm pa Bale, edhe Solari po vepron në të njëjtën mënyrë… Zidane nuk e llogariti Bale në pjesën vendimtare të Ligës së Kampionëve. Uellsiani luajti pesë nga shtatë lojërat e mundshme, por ia doli të ishte përcaktues në finale. Ai luajti vetëm kundër Juventusit, nga fillimi.
Real Madridi e humbi atë ndeshje gjysmëfinale në “Santiago Bernabéu” (1-3). Zidane u lodh nga Bale dhe zgjodhi Isco, i cili rrëmbeu vendin, duke luajtur me një skemë 4-4-2. Ish-lojtari i Malaga-s luajti ndeshjet e para të Champions-it kundër PSG, Juventus dhe Bayern Munich. Të gjitha këto, Bale i filloi nga stoli. Edhe në finale, kundër Liverpool, e njëjta gjë ndodhi, edhe pse meritat shkuan të gjitha për Bale, sepse shënoi dy gola.
E njëjta situate me të edhe këtë sezon, teksa mungon në ndeshjet e rëndësishme. Madje, kemi parë se një tjetër partner po e merr vendin e tij. Nuk është më Isco, i cili, gjithashtu, po kalon nëpër një situatë të komplikuar me trajnerin Solari, por Lucas Vazquez. Ky i fundit, që nga ardhja në stol e trajnerit argjentinas, ka luajtur 19 nga 24 ndeshje të mundshme (79% e totalit). Galiciani ka spikatur në krahun e djathtë të sulmit të Real Madridit, duke shoqëruar Benzema dhe Vinicius. Thënë ndryshe, uellsiani ka konkurrencë të ashpër në rolin e vet.
Viti 2019 është konfirmimi se Solari nuk e ka Bale në plane si titullar. Së pari, për shkak të lëndimeve. Së dyti, sepse skuadra po funksionon mjaft mirë. Kundër Villarrealit, pas pushimit të lojës, ai nuk u hodh në fushë. Një dëmtim, i teti i tij në atë pjesë të trupit, e la jashtë fushës edhe atë ndeshje. Që nga kthimi i tij, kundër Girona, në çerekfinalen e Kupës së Mbretit, ai ka marrë pjesë në katër ndeshje.
Vetëm njërën prej tyre e nisi si titullar (kundër Alaves, në “Bernabeu”) dhe nuk e mbaroi atë. Ky kufizim, përtej lëndimeve, vjen edhe për shkak të vendimeve të Solarit. Nga katër ndeshjet, pas riaftësimit, tri prej tyre i ka nisur nga stoli. Kjo ndodhi edhe në Barcelonë, të mërkurën e kaluar, ndeshja më e rëndësishme e skuadrës madrilene deri tani. Dhe paraqitja e tij në “El Classico” ishte shumë diskrete: vetëm tri kontakte me topin në 26 minuta lojë.