Kapiteni i Manchester City, Vincent Kompany në një intervistë dhënë për “Sky Sports” menjëherë pas triumfit ndaj Chelseas, në finalen e Carabao Cup, foli për suksesin në fitimin e trofeut, pa kursyer edhe komentin e tij në lidhje me incidentin në kampin kundërshtar, me portierin Kepa që refuzoi vendimin e trajnerit Sarri, për tu zëvendësuar para ekzekutimit të penalltive.
“Është një trofe i vishtirë për tu fituar. Kanë qenë të gjithë të përfshirë në këtë sukses, nga djemtë e rinj në fillim dhe deri tani. Janë të gjithë të përfshirë. Unë jam gjithmonë gati të luaj, jam stërvitur fort, por jam shumë i lumtur të arrij këto suksese me këtë klub të jashtëzakonshëm”, deklaroi Kompany.
“Personalisht unë e di se sa i mirë është Willy Caballero te penalltitë. Herën e kaluar ne e fituam, ose më saktë ai e fitoi këtë trofe për ne. Për këtë arsye unë nuk doja që ai të aktivizohej. Në fund nuk ndodhi. Natyrisht që nuk e kam parë kurrë një gjë të tillë. Sa do të doja që ta bëja edhe unë sa herë që trajneri do të kërkonte të më zëvendësonte”, tregoi Kompany.
