Shumë gjëra kanë ndryshuar gjatë viteve në futboll. Gjithsesi, një gjë ka mbetur konstante, dhe mund të duket banale, por fakti se fanellat e lojtarëve kanë numra është një detaj shumë, shumë i rëndësishëm. Sigurisht, në futbollin e së kaluarës, numrat e fanellave shpërndaheshin para ndeshjeve në bazë të rolit, por me kalimin e viteve kanë filluar të zgjidhen nga lojtarët. Dhe zgjedhjet e çuditshme nuk kanë munguar.
Shpesh pyesim veten pse një lojtar fiksohet me një numër dhe nuk ka dëshirë ta ndryshojë gjatë gjithë karrierës së tij. John Terry, për shembull, ka zbuluar arsyen pse ka mbajtur gjithmonë atë numër, tashmë legjendar, mbrapa krahëve. Me një postim të bërë në Instagram, ish-kapiteni i Chelsea-t i ka kthyer përgjigje tifozëve që e kanë pyetur në lidhje me zgjedhjen e tij.
“Kur jam bërë pjesë e ekipit të parë të Chelsea-t, ai ka qenë numri im. Kam parë disa tifozë që kanë veshur fanellën me emrin tim dhe atë numër. Nuk doja që të shpenzonin para të tjera për një fanellë tjetër”, ka qenë shpjegimi i Terry. Një gjest për t’u vlerësuar nga ana e ish-mbrojtësit, i cili nuk është treguar po aq i këndshëm me një tifoz, i cili nuk i ka bërë asnjë pyetje, por e ka provokuar me mesazhin: “Tottenham përgjithmonë!”.
Terry i është përgjigjur edhe atij, duke e fundosur. Nuk ka përdorur fjalët për ta bërë një gjë të tillë, por dy emoji: një trofe dhe një palë sy, për të treguar se nga anët e “Spurs” ka shumë vite që nuk shohin një trofe.