Liverpool, pas dy barazimeve radhazi, është rikthyer te fitorja teksa ka mposhtur 3-0 Bournemouth në Anfield.
Skuadra e Jurgen Klopp ka bërë një paraqitje të denjë duke rimarrë kreun e renditjes së Premier League.
Ishte Sadio Mane ai që zhbllokoi rezultatin, përpara se Wijnaldum të dyfishonte me një gol kryevepër. Golin e tretë e ka shënuar Mo Salah në pjesën e dytë.
Bournemouth është viktima e preferuar e egjiptianit, ai ka shënuar plot 6 gola ndaj tyre, më tepër se ndaj çdo skuadre tjetër.
Edhe Arsenal është rikthyer te fitorja pas disfatës me Manchester City. Topçinjtë kanë mposhtur 2-1 ekipin më të dobët të Premier League, Huddersfield.
Londinezët kanë shënuar dy herë gjatë pjesës së parë me Iwobi dhe Lacazette dhe shkojnë në kuotën e 50 pikëve, po aq sa Chelsea me një ndeshje më pak.
Në fund të takimit, Huddersfield ka shënuar golin e nderit, duke u zhbllokuar pas mbi 9 orëve pa shënuar.
Ndërkohë në ndeshjet e tjera, Crystal Palace ka barazuar 1-1 ndaj West Ham. Southampton ka pësuar një humbje të rëndë në luftën për të qëndruar në Premier League teksa është mposhtur 1-2 nga Cardiff në shtëpi.
Watford ka mposhtur Everton 1-0 dhe Marco Silva rrezikon vendin e punës pas një tjetër paraqitjeje të dobët të skuadrës së tij.
