Vinicius Junior padyshim që është një nga diamantet e futbollit modern dhe Real Madrid ka fatin që e rrëmbeu shpejt, e i dha shansin të luajë në skuadrën e parë. Mirëpo deklarata e tij e djeshme ku theksoi se nuk kishte frikë nga Messi për “El Calsico-n” e nesërme bëri bujë të madhe.
Në vitin e tij të parë në Madrid, Vinicius ka luajtur në më shumë se 25 ndeshje. Ndërkohë që Messi në sezonin e tij të parë në “Camp Nou” luajti në 9 ndeshje dhe vetëm një si titullar.
18-vjeçari u ble për 45 milionë euro nga Flamengo dhe arriti të kalojë nga Real Castilla në ekipin e parë duke luajtur në total në 25 ndeshje në La Liga, Copa del Rey, Botërorin e Klubeve dhe Champions League, duke filluar si titullar në 16 raste.
Në paraqitjet e tij braziliani ka shënuar 4 gola dhe ka shërbyer 12 asist. Messi në vitin e tij të parë arriti të luajë vetëm 75 minuta në 7 ndeshje në kampionatin spanjoll dhe golin e tij të parë e shënoi në javën e 34-të në ndeshjen kundër Albacete pas një pasimi perfekt nga Ronaldinho.
Ndërkaq në Champions League Messi luajti vetëm një ndeshje në fazën e grupeve, atë ndaj Shakhtar Donetsk, që e fituan me rezultatin 2-0.
Në “El Clasico-n” e parë në kampionat braziliani ishte i papërmbajtshëm në ato minuta që hyri në fushë, pavarësisht se u ndalën në barazim 1-1. Debutimi i Messit ndaj Real Madridit do të ishte vetëm në sezonin 2005-06, ndeshje të cilën e fitoi Barcelona me rezultatin 3-0, ndërsa më 20 nëntor 2004, trajneri Frank Rijkaard e grumbulloi argjentinasin por nuk e hodhi për asnjë minutë në fushë.
