Atletico Madrid mposhti në çdo drejtim Juventusin të mërkurën në mbrëmje, duke shkaktuar një nga befasitë e sezonit, pasi italianët me Cristiano Ronaldon në ekip dukeshin favoritë të mëdhenj për suksesin e madh, apo për të kapur të paktën finalen.
Megjithatë, fitorja e Colchoneros nuk ishte një surprizë e madhe për ata që e njohin klubin madrilen. Nëse studiohet në thellësi përbërja e Atletico-s, bie në sy një lidhje vëllazërore që shpjegon pse skuadra e drejtuar nga Diego Simeone është aq solide dhe luftarake në fushë.
Ajo që të bën përshtypje është jetëgjatësia e kësaj skuadre, sepse në 11-shen e Atleticos që u ndesh me Juven asnjë lojtar nuk ka më pak se 5 vite në klub.
Koha mesatare që ka qenë çdo futbollist te klubi madrilen është 8.67 vite – një shifër mahnitëse, po të mendosh që në futbollin modern shumë pak futbollistë qëndrojnë për shumë vite në një klub.
Besnikëri absolute, por edhe një dëshirë e pabesueshme për të luajtur dhe për të fituar me këtë klub, me Diego Simeonen në stol. Me këtë të fundit statistikat e Atleticos janë impresionuese.
Një përdorues në Twitter, Zach Lowy, ka publikuar një seri statistikash interesante, që bëjnë edhe krahasimin me Juventusin, aty ku vetëm Chiellini e Bonucci kanë më shumë se 4 vjet në klub.