Skandali që përfshiu futbollin shqiptar riktheu dhe një here kujtimet e “errëta” të sportit në Shqipiëri. Ngjarja e ndodhur në Kamëz ku presidenti dhe një grup tifozësh goditën me grushta arbitrin kryesor Eldorian Hamitaj. Shkak i kësaj ngjarje ishte dhënia e penalltisë në minutën e 95-të ekipit kundërshtar. Çka e çoi rezultatin e ndeshjes me pike të barabarta.
AlpeNews.al ju sjell disa nga ngjarjet e “zeza” të futbollit tone:
Maj 2016 / Peshkopi – FNSH ka ndihmuar të nxjerrë nga stadiumi skuadrën e dhunuar të Kastriotit, pas një ore e gjysmë ngujimi brenda. Pas dhunës së ushtruar ndaj lojtarëve krutanë, uniformat blu nuk kanë arritur të ndalojnë civilët vendas, që gjuanin me ç’të mundnin ndaj mysafirëve. Fusha e Korabit u dënua një sezon, edhe pse skuadra dibrane siguroi ngjitjen në Superiore.
Nëntor 2015: Sopoti – Iridon Bahiti, pas ndeshjes me Luftëtarin, në Kompleksin e Pezës, hyri në fushë dhe tentoi të godiste gjyqtarin Sokol Çekaj. Nëse këtë s’e arriti dot ta bënte, sepse ndërhynë ato pak forca policore private, që ishin aty, e pështyu në fytyrë kryesorin nga Laçi. Ajo pështymë i ka kushtuar 2 vite (24 muaj) pezullim nga çdo aktivitet sportiv në Shqipëri zyrtarit të Sopotit, Iridon Bahiti.
2014: Bylis – Ekipi i KF “Bylis”, për dështim në organizimin e ndeshjes dhe përmbushjen e përgjegjësive, bazuar në nenet 29, 64 dhe 65.2 të KDS, u dënua me përjashtim nga kampionati dhe zbritjen një kategori më poshtë, si dhe humbjen e ndeshjes në tavolinë me KF “Laçi“, me rezultatin 3-0.
Zyrtari i KF “Bylis”, Besnik Kapllanaj, për dhunë fizike ndaj zyrtarëve të ndeshjes u përjashtua përgjithmonë nga çdo aktivitet sportiv. Kujtojmë se delegati Besnik Çela u godit me sende të forta në kokë në Ballsh, pas ndeshjes me Laçin, ndërsa pas mjekimeve në spitalin e Fierit bëri kallëzimin në komisariat për Kapllanajn.
2011: Laçi: Ndeshja me Kastriotin kishte përfunduar 1-1, por tifozë e zyrtarë vendës goditën drejtues e arbitra, kryesisht Lorenc Jeminin. Bardhezinjve iu zbritën 6 pikë nga klasifikimi dhe gjysmën e sezonit të ardhshëm e luajtën në fusha asnjanëse.
2011: Pogradeci – Ndeshja ndaj Teutës kishte përfunduar, por u godit një zyrtar i FSHF-së. Liqenorëve iu zbriten tri pikë nga klasifikimi.
2009: Tërbuni – Edhe pse kishte përfunduar ndeshja, tifozë e drejtues vendës u futën në fushë dhe goditën zyrtarët e ndeshjes ndaj Kastriotit. Vendimi i Disiplinës ishte zbritja e Tërbunit një kategori më poshtë dhe dhënia e 3 pikëve në tavolinë krutanëve!
Flamurtari-Skënderbeu – Vetëm se u godit me një grusht presidenti i skuadrës korçare, Ardian Takaj, Flamurtarit iu zbritën tri pikë nga klasifikimi.
24.09.2006 / Vlorë – Drejtuesit e klubit “Flamurtari” uzurpojnë fushën e tyre, pas dhënies së një penalltie për bregdetarët në ndeshjen Flamurtari-Teuta. KF Flamurtari dënohet me 3 ndeshje pezullim të fushës dhe 100 mijë lekë të rinj gjobë.
/Alpesport.al
