Marko Pjaca ka këputur ligamentet e gjurit të majtë, këtë e konfirmoi vetë klubi i Fiorentinës, aty ku kroati është lënë në huazim nga Juventus.
Sulmuesi anësor para dy vitesh këputi ligamentin e gjurit të djathtë dhe mungoi për 7 muaj, ndërkohë që klubi nga Firence raportoi se në ditët në vijim do të kryhet operacioni dhe do të fillojë faza e rikuperimet.
Me këtë dëmtim 23-vjeçari ka mbyllur zyrtarisht sezonin dhe do tentojë të kthehet edhe një herë më i fortë për sezonin e ardhshëm.
Pjaca e nisi mirë huazimin te Fiorentina duke luajtur si titullar në 19 ndeshje në Serie A këtë sezon dhe kontribuoi me 1 gol e 1 asist, më pas nuk arriti të gjejë më hapësirë dhe përfundoi në stol. Kujtojmë që Juventus e bleu nga Dinamo Zagreb për 23 milionë euro, asokohe cilësohej si një talent me të ardhme të ndritur, por që më vonë hasi vështirësi dhe u huazua te Schalke e për dy sezone te Fiorentina.
