Në Spanjë prej muajsh diskutohet për të ardhmen e sulmuesit Antoine Griezmann dhe ylli i Atletico Madridit duket se po mendon seriozisht largimin, pas një tjetër sezoni pa trofe me Atletico-n, që u eliminua në mënyrë të hidhur nga Juventusi në Champions League.
Kampioni i botës nuk ka lëshuar asnjë deklaratë ku jep sinjale largimi, por ndërkohë zërat për transferim te Barcelona sa vijnë e shtohen.
Tani edhe ish-futbollisti i njohur i Monaco e PSG, Jerome Rothen, lëshon një deklaratë të bujshme, duke e bërë të kryer transferimin e bashkëkombasit të tij te Barcelona.
“Ju siguroj që Barcelona ka kryer punë, e ka Griezmann në dorë”, tha Rothen për RMC, të mërkurën, ndërsa një ditë më pas konfirmoi gjithçka kishte thënë, duke folur sërish në radion franceze.
“Burimet e mia zakonisht janë shumë të mira, më thonë që Griezmann dëshiron të largohet. Barcelona nuk e zyrtarizon dot që tani, por do ta shihni në korrik”, tha ish-futbollisti i kombëtares franceze.
“Natyrisht, Barça nuk do presë deri në qershor për të nisur bisedimet, sepse në merkato gjërat mbyllen që në shkurt-mars. Verën e shkuar Griezmann qëndroi me dëshirë tek Atletico, por loja mbrojtëse e Simeones dhe mungesa e trofeve e kanë lodhur”.