Jo vetëm Cristiano Ronaldo. Ndeshja me ekipin kombëtar ka shënuar një tjetër “viktimë” nga Serie A. Fjala është për suedezin e Sampdorias, Albin Ekdal, që do të mungojë në ndeshjen e së shtunës mbrëma, kundër Milanit.
Mesfushori u detyrua ta lërë fushën pas rreth një ore lojë, në kualifikuesen Norvegji-Suedi (3-3), për shkak të prerjes së thellë në gju. Ekdal, i intervistuar në fund të sfidës nga “STV Sport”, nuk e fshehu seriozitetin e dëmtimit, duke frikësuar Sampdorian:
“Unë kam dy lëndime të dukshme në gju. Mjekët e kombëtares e hapën pak plagën dhe kuptova se çfarë kishte ndodhur. Shpejt më qepën në dy vende, plaga ishte e hapur, mund ta shihje mishin dhe gjakun…
Tani të shohim. Sa kohë më duhet për t’u shëruar, nuk kam asnjë ide. Eshtë herët, do të kthehem te Sampdoria (sot), pastaj do ta analizojmë situatën. Mendoj se do të mos luaj dot për një, ose dy javë”.
Në këtë rast, sigurisht, Ekdal do të humbasë ndeshjen kundër Milanit dhe do të ishte në rrezik të madh për transfertën e mesjavës së ardhshme në Torino.
