Franceso Tahiraj është rikthyer titullar me Hajduk Splitin pasditen e sotme, në ndeshjen e radhës të kampionatit kundër Rudes. Sulmuesi anësor, i cili nuk u grumbullua nga Christian Panucci në kombëtare, ka bërë një ndeshje fantastike mbrëmjen e sotme.
22-vjeçari ka asistuar golin e parë të Hajdukut në minutën e 32` të takimit. Mjafton një super aksion, që nis nga mbrojtja e Hajduk dhe përfundon në këmbët e Tahiraj. Ky i fundit vrapon drejt zonës dhe i vetëm përballë portierit gjuan drejt portës.
Topi shkon drejt rrjetës, por ende pa kaluar vijën fatale, është Mijo Caktas që shtyn drejt sferën, duke i mohuar golin e parë me fanellën e Hajdukut futbollistit të kombëtares. Gjithsesi për Francesco Tahirajn vlen asisti, i cili bëhet i dytit që prej ditës që është transferuar në Kroaci te skuadra e Hajduk Splitit.
Ndërkohë skuadra e Tahirajt shënoi dhe dy gola të tjerë në pjesën e dytë të lojës, duke marrë tre pikë të rëndësishme, të cilat e ngjisin në kuotën e 40 pikëve në vendin e pestë, një më pak se Lokomotiva e Zagrebit ku luan Myrto Uzuni, që mban vendin e katërt, që të çon në Europa League.
