Stadiumi “Selman Stërmasi” është i pajisur me kamera sigurie për shkak të problematikave që janë shfaqur javët e fundit me dhunën e tifozëve. Këtë herë, sherri ngjitet në një shkallë më të lartë, te drejtuesit e klubeve dhe futbollistët pas ndeshjes ndërmjet Tiranës dhe Laçit. Takimi u mbyll me rezultatin 1-1 dhe tensioni ishte shumë i lartë.
Kamera e sigurisë e vendosur në ambientet e brendshme të stadiumit “Selman Stërmasi” ka filmuar krejtësisht dinamikën e ngjarjes. Ka qenë një polemikë e presidentit Pashk Laska dhe sulmuesit Michael Ngoo që ka ndezuar situatën. Sulmuesi anglez i është afruar numrit një të klubit kurbinas dhe aty të dy kanë tentuar të godasin njëri-tjetrin.
Kleo Laska, djali i presidentit të Laçit dhe zyrtar i klubit i është drejtuar sulmuesit anglez dhe aq ka mjaftuar që sherri të shpërthejë në masë të gjerë. Një nga futbollistët e dëmtuar është dhe Sefgjini që goditet nga lojtarët e Tiranës. Pamjet filmike janë të qartë për të gjithë protagonistët, të shohim se si do të reagojë Komisioni i Disiplinës.