Florentino Perez dhe Zinedine Zidane, një pakt “zotërinjsh”. Nuk është dashur shumë që ta bindë trajnerin të kthehet në Madrid, shtëpinë e tij. Florentino Perez, megjithatë, ka thënë ato “fjalë magjike” që shpesh të bëjnë të lësh mënjanë ndonjë pakënaqësi.
Sipas “Marca”, dy telefonata të gjata javën e shkuar kanë sjellë në fund përgjigjen: “Digo si Pres (president)! Me vuelvo”. Pra, “them po president, po kthehem!”. Zizu, në fakt, donte garanci ekonomike, por sidomos që të merrte nën kontroll gjithçka. Veç kësaj, Perez i ka kujtuar dhe triumfet e arritura bashkë dhe se ndoshta nuk bëri maksimumin që ta mbante në stol, duke menduar se kishte ardhur koha e revolucionit.
“Populli të do dhe lojtarët të duan. Eja sërish Zizu”.
