Pavarësisht spekulimeve dhe deklaratës së Khabib Nurmagomedov se do të rikthehet sërish në kafaz në nëntor, presidenti i UFC-së, Dana White ka një tjetër mendim. Numri 1 i arteve marciale mikse ka bërë me dije sot se rusi do të rikthehet të duelojë dy muaj më herët nga parashikimi, në shtator.
Nurmagomedov është i pezulluar nga Komisioni i Sportit në Nevada deri në fillim të qershorit, për incidentin që shkakoi bashkë me Conor McGregor në eventin UFC-229. Rusi është kampioni i botës në peshën e lehtë, titull të cilin e mbrojti pikërisht ndaj rivalit irlandez 6 muaj më parë.
“Ai do të rikthehet sërish në kafaz në shtator. Ai është ende i pezulluar, ndërkohë që ka thënë se nuk do të duelojë gjatë kohës që është Ramazani. Për pasojë, koha më e përshtatshme është shtatori”, u shpreh Dana White për mediat amerikane.
Nurmagomedov pritet të duelojë me fituesin që do të dalë nga përballja mes Max Holloway dhe Dustin Poirier. Ata do të duelojnë për titullin e përkohshëm dhe më pas fituesi do të duelojë me rusin. Mbetet për t’u parë nëse Nurmagomedov do të rikthehet në shtator apo në nëntor.
