Miliarderi francez François-Henri Pinault, pronari i klubit të futbollit Rennes, ka premtuar se do të paguajë 100 milionë euro për të ndihmuar për rindërtimin e Katedrales së Notre Dame, pasi ndërtesa historike u shkrumbua nga zjarri të hënën.
Pinault, i cili zotëron edhe markat Guçi e Saint Laurent, deklaroi për AFP: “Babai im, François Pinault, dhe unë, kemi vendosur të dhurojmë 100 milionë euro, për të marrë pjesë në përpjekjet që do të nevojiten për rindërtimin total të Notre Dame”.
Zjarri masiv i së hënës shkatërroi pjesën më të madhe të katedrales, por të paktën kullat me kambanat ikonike nuk u prekën, disa relikte të famshme janë shpëtuar dhe tashmë zjarri është shuar.
François-Henri Pinault nuk është miliarderi i vetëm që ka deklaruar se do të japë kontribut, sepse edhe grupi LVMH Group i drejtuar nga Bernard Arnault, që zotëron Louis Vuitton, Christian Dior dhe Givenchy, do të dhurojë 200 milionë euro.
