“Europa League” e nxori më mirë në pah yllin e Benfica, Joao Felix, autor i një “hat-trick” në çerekfinalen e parë kundër Eintracht. Në fund, skuadra portugeze u eliminua nga ky kompeticion, por nuk u minimizua rrezatimi i xhevahirit 19-vjeçar. Në Portugali e kanë krahasuar prej një kohe të gjatë me Cristiano Ronaldon, ndërsa interesi i Juventusit për të është i madh.
Ashtu si ai i Manchester City, i cili, sipas asaj që është transmetuar nga “Mais Bastidores” në kanalin “TVI”, është gati për hapin vendimtar në këtë operacion. Klubi anglez do ta paguante plotësisht klauzolën e lirimit të lojtarit, prej 120 milionë euro, për t’i siguruar shërbimet e Joao Felix dhe mundur konkurrencën e “Zonjës së Vjetër”.
Pavarësisht nga marrëdhëniet e shkëlqyera midis Andrea Agnelli dhe Jorge Mendes, menaxherit të 19-vjeçarit, duket se përcaktuese do të jenë milionat e sheikëve të “qytetarëve”. Juventusi e konsideron këtë shumë mjaft të lartë, edhe për një talent të tillë, me një të ardhme të shkëlqyer dhe të sigurt. Kjo e ardhme, nëse nuk ndodh diçka e pabesueshme, duket se do të jetë mijëra kilometra larg Torinos. Në Angli, te Machester City.