Gola, nivel i lartë loje dhe rol prej lider, kjo është ajo që Amerika Latine i jep Gabriel Barbosas. Ai po vijon të shënojë gola dhe të ruajë ritmin e lartë të lojës me Flamengon, ku ai është bërë golashënuesi më i mirë i kampionatit brazilian.
Ndërkohë në Itali, Inter ka vendosur për të ardhmen e tij. “Calciomercato.com” ka bërë me dije se drejtuesit zikaltër, me në krye Marottan kanë refuzuar ofertën e Flamengo, për ta mbajtur edhe për një vit në huazim sulmuesin brazilian duke i paguar pagën e tij.
Inter në anën tjetër ia ka bërë të qartë se Gabigol do të shitet në merkaton e verës. Vlera e tij llogaritet në 15-20 milionë euro dhe vetëm ndonjë klub nga Europa ose Kina mund të ofrojë një shifër të tillë.
22-vjeçari nuk është më në planet e klubit zikaltër dhe kërkojnë që të përfitojnë sa më shumë nga shitja e tij, që të mbushin arkën dhe të kenë edhe më shumë financa për të shpenzuar në merkato.