Dy ndeshje, pas javësh të tëra në “frigorifer”, i kanë mjaftuar Mauro Icardit që të rigjejë buzëqeshjen, edhe për faktin se në Genova gjeti një gol të rëndësishëm dhe pak nga pak tifozët po i harrojnë inatet e akumuluara prej muajsh.
Buzëqesh Icardi, buzëqesh edhe bashkëshortja-agjente e tij, Wanda Nara, e cila në emisionin Tiki Taka ishte në humor të shkëlqyer: “Janë ditë të lumtura për ne. Mauro u kthye me gol në një ndeshje të vështirë dhe ishte diçka speciale, një ndër paraqitjet më të mira që kam parë”.
Një lajm i bukur, pas muajsh të tërë batutash ironike, ngacmimesh, provokimesh, bisedimesh me avokat dhe paqes së brishtë.
Në San Siro kundër Atalantës Icardi nuk shënoi, por fitoren më të madhe e arriti me tifozët, sepse ndryshe nga Curva Nord, pjesa tjetër e stadiumit e mbështeti. Për momentin vazhdohet kështu, me synimin për të siguruar sa më shpejt kualifikimin në Champions, ndërsa më pas, në verë, do të rinisin bisedimet dhe ndoshta edhe lojërat mediatike, me ndonjë largim të mundshëm në horizont.
