Nëna e Romelu Lukakut është mjaft e lumtur pasi e takoi Lionel Messit pas ndeshjes ndërmjet Manchester Unitedit dhe Barcelonës.
A mund ta imagjinoni të jeni nënë e një ylli të Premierligës, se sa do të mburreshit?
Por, duket se për një moment edhe Romelu Lukaku ka mbetur nën hijen e Lionel Messit, teksa nëna e sulmuesit belg demonstroi se është një fanse e madhe e yllit argjentinas, shkruan Gazeta Express.
Në një video të postuar në internet shihet Adolphine Lukaku, e cila e shpreh gëzimin që u takua me sulmuesin e Barcelonës në “Old Trafford” javën e kaluar.
Messi ishte pjesë e Barcelonës në fitoren 1:0 ndaj Manchester Unitedit në Angli, ndërsa Adolphine bërtiti si një vajzë e vogël teksa po bënte foto me argjentinasin.
“Messi, Messi, Messi”, thërriste ajo, ndërsa po takohej me pesë herë fituesin e Topit të Artë.
