Në Gjermani rastet e të infektuarve janë rritur ndjeshëm në dy ditët e fundit. “Bild” shkruan se në klubin e Shalkes dyshohet për një të infektuar edhe pse ende nuk ka asnjë komunikim zyrtar nga skuadra.
Në fillim u mendua për një punonjës të një dyqani të klubit dhe më pas të një tjetri në mensën e klubit. Tani dyshimet janë rritur pasi mendohet të flitet për një lojtar, i cili mund të jetë prekur nga virusi vdekjeprurës. Gjithsesi, kjo mbetet vetëm në një spekulim. Ndërkohë që drejtuesit e klubit blu nuk kanë lejuar asnjë gazetar t’i afrohet selisë të klubit.
Thuhet se lojtarët nuk lejohen të dalin deri në një kohë të caktuar. Ndeshja e radhës do të luhet me Borusian e Dortmundit me dyer të mbyllura. Nuk dihet ende nëse do të ketë një shtyrje të derbit, por e sigurt që nëse ky lajm vërtetohet, atëherë sfida me verdhezinjtë nuk do të luhet deri në një datë tjetër.
Të gjitha dyqanet përreth qendrës së klubit si dhe kafenetë janë mbyllur për një kohë të caktuar. Ministri i Shëndetësisë në Gjermani ka deklaruar se kurrsesi nuk duhet të luhet me shëndetin e tifozëve por edhe të lojtarëve.
Edhe pse kjo do të ketë një kosto të madhe për klubet e Bundesligës. Në ditët në vazhdim pritet që klubet të mblidhen dhe të diskutojnë për vazhdimësinë e kampionatit, i cili rrezikon edhe pezullimin deri më 3 prill.
