Ylli i Kosovës, Edon Zhegrova, ka shfrytëzuar për mrekulli hapësirat e dhëna nga trajneri i Baselit.
Zhegrova, i cili është në pronësi të Genk, por luan në formë huazimi te skuadra e Baselit, nuk ka pasur hapësira deri tani në formacionin e skuadrës zvicerane.
Në ndeshjen e fundjavës, skuadra e tij do të përballej me Grasshoppers dhe trajneri Marcel Koller vendosi t’i japë hapësira talentit kosovar.
Zhegrova luajti për plot 75 minuta, në një takim në të cilin prodhoi dy mundësi të mira shënimi për skuadrën e tij.
Përveç dy goditjeve, anësori i Kosovës pati edhe shumë depërtime të suksesshme, duke qenë rrezik konstant për mbrojtjen kundërshtare.
20-vjeçari ishte shpallur lojtari i ndeshjes, por performanca e tij duket se është vlerësuar edhe më shumë se aq.
Emri i Edon Zhegrovës figuron edhe në formacionin e javës në Superligën e Zvicrës. Ai është i vetmi nga skuadra e Baselit që ka zënë një vend aty.
