Dhuna në Shqipëri është zhvendosur në Kategorinë e Parë.
Kryendeshja e ditës së sotme në Kavajë ndërmjet Besës dhe Bylisit ka degjeneruar në dhunë duke na sjell sërish pamje të turpshme.
Pas kartonit të kuq të mbrojtësit Danaj në minutën e 75-të për ndërhyrje të ashpër ndaj sulmuesit Gudindo, tifozët vendas kanë reaguar ashpër nga tribuna duke goditur me një copë betoni arbitrin anësor Agaraj.
Menjëherë pas kësaj situate, u ndërprye ndeshja por një rrebesh gurësh e shishesh ka fluturuar drejt treshes së gjyqtarëve dhe futbollistëve të Bylisit.
Në fushë u futën edhe forcat e rendit por situata ishte e paprecedent ndërsa nga pamjet duket që për të ndalur gurët e tifozëve mendoi sulmuesi Albi Çekiçi i cili bëri gjestin e madh duke mbrojtur gjyqtarin e ndeshjes.
Para se të ndërpritej ndeshja, Bylis po fitonte në transfertë me rezultatin 0-1 me Antoni Bejin që shënoi golin e vetëm gjatë pjesës së parë.
Aktualisht, ballshiotët kryesojnë me tri pikë më shumë se Besa e vendit të dytë.