Sot në orën 20:30 Interi në “San Siro” do të luajë një “finale” të vërtetë pasi do të përballet me Juventusin në ndeshjen e vlefshme për javën e 34 në Serie A.
3 pikë të arta për zikaltrit do të ishte një hap i madh dhe shumë i rëndësishëm drejt kualifikimit sezonin e ardhshëm në Champions League.
Javën e kaluar “Zonja e Vjetër” siguroi titullin e 8-të radhazi në Itali dhe tashmë këtë “derbi” do ta luajë për prestigj.
Janë plot 171 përballje zyrtare mes dy klubeve të mëdha italiane në historinë e Serisë A, nga të cilat 85 janë luajtur pikërisht në shtëpinë e zikaltërve.
Të avantazhuar nga shifrat vijnë bardhezinjtë e Allegrit, që numërojnë një total prej 82 fitoresh kundër 46 sukseseve të zikaltërve, ndërsa barazimi mes tyre është shënuar për plot 43 herë.
Gjithsesi, duhet thënë se sa i përket bilancit në “San Siro”, zikaltrit kanë një avantazh me një total prej 35 fitoresh ndaj 23 sukseseve të bardhezinjve, si dhe 22 barazime të shënuara në shtëpinë e skuadrës që drejtohet nga Spalletti.
