Duke u nisur nga kualifikimi dramatik i Totenhemit falë golave në fushën kundërshtare ndaj Mançester Sitit, “Sky sport” ka bërë një përmbledhje për të gjitha momentet decizive që “VAR” ka ndërhyrë për të ndihmuar arbitrin në fushën e lojës.
Me “VAR” që u prezantua për herë të parë në këtë sezon në ndeshjet me eliminim direkt në Champions, Tottenhami përfitoi duke arritur të kualifikohej për në fazën tjetër. Vendime që ndikuan në rezultatin e takimit dhe përcaktuan fatin sezonal të skuadrave. “VAR” që në fillim u pa si i shenjtë nga tifozët dhe skuadrat, tani është kthyer në një makth për shumë prej tyre. Disa e duan, disa jo.
13 SHKURT/ AJAX-REAL MADRID
Hera e parë që “VAR” u thirr në apel ishte goli i anuluar i Ajaksit në sfidën me spanjollët. Taljafiko shënon, por arbitri Skomina anulon gjithçka pas konsultimit me “VAR”, pasi Tadiç interferoi me portierin duke bërë të pavlefshëm golin. Ndeshja përfundoi 1-2 për madrilenët.
20 SHKURT/ SCHALKE-MAN.CITY
Siti ishte në avantazh kur Kaliguri godet topin që ndalet në dorën e Otamendit, arbitri i ndihmuar nga “VAR” jep 11-metërsh për Shalken, e cila humbi në fund ndeshjen me rezultatin 3-2. Siti fitoi gjithashtu ndeshjen e kthimit me rezultatin 7-0 duke u kualifikuar për më tej.
20 SHKURT/ ATL. MADRID-JUVENTUS
Atletiko fitoi një penallti me anë të Diego Kostës në pjesën e parë, por “VAR” anulon vendimin e arbitrit pasi kontakti kishte ndodhur jashtë zonës. Në pjesën e dytë, “VAR” shpëton sërish bardhezinjtë pasi Moratës iu anulua një gol. Spanjolli shtyu Kielinin në zonë. Një rast që hapi shumë polemika. Në fund, Juventusi u kualifikua, edhe pse humbi ndeshjen e parë me rezultatin 2-0, Ronaldo shënoi tre gola në Torino duke kualifikuar skuadrën për në turin tjetër.
6 MARS/ PSG-MAN. UNITED
Një ndeshje dramatike në Paris ku Mançester Junajtid fitoi një penallti në minutën e 94-t pas një prekjeje të topit me dorë nga Kimpepe. Ishte një vendim shumë i diskutueshëm që në fund rezultoi deciziv për “djajtë e kuq”, të cilët fituan 1-3 duke përmbysur rezultatin e ndeshjes së parë.
6 MARS/ PORTO-ROMA
Pasi loja po shkonte drejt penalltive, arbitri turk, Çynejt Çakër, akordon një 11-metërsh me ndihmën e “VAR” për skuadrën e Portos pas një mbajtjeje në zonë të Fernandos nga Florenci. Teles shënoi nga pika bardhë duke u dhënë kualifikimin portugezëve.
12 MARS/ MAN.CITY-SCHALKE
“VAR” e quajti të rregullt golin e katërt të shënuar nga Sterling i cili kishte ardhur nga një pozicion i rregullt pas një krosimi të Sane.
9 PRILL/ TOTTENHAM-MAN.CITY
Mançester Siti fiton të drejtën e 11-metërshit pasi Bjorn Kaipers, arbitri i ndeshjes, sheh në monitorin e “VAR” një prekje të topit me dorë nga Rose në zonën e penalltisë. Auguero nuk arrin të shënojë nga pika e bardhë pas pritjes së Loris. “Spërsat” fitojnë në fund 1-0.
16 PRILL/ BARCELONA-MAN. UNITED
Barcelona fiton një penallti në minutën e 11-të. Por Bryzh anulon gjithçka pasi sheh rastin në monitor duke konstatuar se Fred prek topin para Rakitiçit. Barcelona në fund arriti të fitojë me rezultatin 3-0.
16 PRILL/ JUVENTUS-AJAX
Ronaldo shënon golin e 126-të në Champions në pjesën e parë. Por Turpin është në dyshim, pasi njëri lojtar i Ajaksit, Veltman rrëzohet në zonë. Sidoqoftë, “VAR” informoi se shtyrja ka ardhur nga shoku i tij i skuadrës, De Ligt dhe goli ishte i rregullt. Ajaksi fitoi në fund me rezultatin 1-2 duke u kualifikuar për në gjysmëfinale.
17 PRILL/ PORTO-LIVERPOOL
Pasi kishin ardhur në Porto me avantazhin e dy golave në ndeshjen e parë, Mane shënon golin e parë për skuadrën e Klop. Lojtari i “reds”-ave ishte në pozicion të rregullt dhe goli u quajt nga “VAR” i vlefshëm.
17 PRILL/ MAN. CITY-TOTTENHAM
Dy vendime: Goli i Totenhemit u akordua- vendimi mbeti në fuqi dhe u konfirmua nga “VAR”. Goli i Sitit në fund akordohet në fillim, por më pas anulohet për pozicion jashtë loje nga “VAR”.
