Lionel Mesi është njeriu i rekordeve dhe në karrierën e tij ka bërë gjëra të jashtëzakonshme. Sigurisht që mund të gjesh edhe momente jo të mira dhe një prej tyre lidhet me faktin që në çerekfinalet e Ligës së Kampionëve nuk ka shënuar prej 6 vitesh. Golin e tij të fundit në këtë fazë të kompeticionit e ka gjetur në prillin e vitit 2013 kundër PSG-së.
Për më tepër, kur Liga e Kampionëve bëhet shumë e rëndësishme, ai nuk ka arritur të jetë vendimtar për Barcelonën dhe kjo është një arsye përse katalanasit nuk kanë arritur të fitojnë Champions.
Në vitin që Leo Mesi mundi të shënonte në çerekfinale, Barcelona u eliminua në gjysmëfinale ndaj Bajernit me një rezultat përfundimtar 7-0. Leo ishte i dëmtuar. “Pleshti” nuk e ka rrëmbyer dot skenën dhe sot në mbrëmje ka shansin që të thyejë tersin për të shënuar në çerekfinalet e Ligës së Kampionëve.