Juventus ka vuajtur, por në fund ka arritur të marrë një fitore 2-1 kundër Milan-it që ka shijen e titullit.
Bardhezinjtë, në fakt, kryesojnë kampionatin me 84 pikë, 21 më shumë se Napoli që mban vendin e dytë, dhe nëse skuadra e Ancelotti-t do të humbasë nesër kundër Genoa-s, “Zonja” do të festonte titullin e tetë radhëzi shtatë javë para fundit të kampionatit.
Ka qenë i përhershmi Piatek që ka zhbllokuar ndeshjen për miqtë në minutën e 39-të, duke shënuar golin e tij të 10-të për Mila-in në 13 ndeshje. Asnjë lojtar i kuqezinjve nuk ka shënuar më shumë se ai në këtë sezon.
Gjithsesi, festa e milanezëve ka zgjatur deri në minutën e 60-të, kur Musacchio ka bërë një ndërhyrje të parregullt kundër Dybala në zonën e rreptësisë, me argjentinasin që nuk ka falur Reina-n. Gjashtë minuta para fundit ka ardhur edhe goli i dytë i vendasve me fenomenin Kean.
Milan rrezikon seriozisht vendin e katërt tani, duke parë se Atalanta, që mban vendin e pestë, është vetëm një pikë larg tyre në renditje dhe me një ndeshje për të luajtur (kundër Inter-it), por nuk duhet harruar as Lazio, që është pesë pikë larg Milan-it, por ka dy ndeshje më pak.
