Mesfushori i Tottenhamit, Christian Eriksen, nuk është i kënaqur me paraqitjen e tij dhe të shokëve të ekipit gjatë humbjes 1-0 ndaj Ajaxin në kryeqytetin anglez.
“Ishim dobët, nuk luajtëm fare lojën tonë. Në 20 minutat e para ishim spektatorë. Duhet të ndryshojmë shumë gjëra për ndeshjen e kthimit. I bëmë të duken shumë më të mirë sesa janë, jo se janë një skuadër e keqe, por i ndihmuam. Ishim më mirë në pjesën e dytë”, tha fillimisht danezi.
“Në fillim të lojës skema nuk kishte shumë rëndësi. Ndryshimi na dha një mënyrë tjetër për të bërë presing dhe të luanim një lojë më direkte. Prapëseprapë ishim shumë larg lojës tonë. Të gjithë e panë që në pjesën e parë ishim dobët dhe nuk donim të konkurronim. Nuk mund të vazhdojmë të flasim për lojtarët e dëmtuar. Është një gjysmëfinale, ata që luajnë duhet të tregojnë veten. Shpresoj të kthejmë rezultatin në Amsterdam”, theksoi Eriksen.
