Trajneri i Liverpoolit, Jurgen Klopp, nuk është pajtuar me deklaratat e homologut të tij te Manchester City, Pep Guardiolës, i cili kishte thënë se triumfi në Premierligë është shumë më i rëndësishëm se fitimi i trofeut të Ligës së Kampionëve.
Para finales së Ligës së Kampionëve kundër Tottenhamit, trajneri gjerman ka theksuar po ashtu se sezoni i të kuqve ka qenë më i mirë se i të kaltërve.
“Premierliga është më e rëndësishme për Guardiolën, sepse ai nuk ka qenë në finale të Ligës së Kampionëve për një kohë të gjatë”, tha Klopp në konferencë për media.
“Të gjithë ne e dimë se ai është trajneri më i mirë në botë dhe ai i meriton lëvdatat që i merr”, shtoi ai.
“Unë them se Liga e Kampionëve është më e rëndësishme, sepse unë mund ta fitoj atë. Ne tashmë e kemi humbur Premierligën, sepse ata kishin ekip më të mirë, por mendoj se sezoni ynë ka qenë më i mirë”, theksoi Klopp.
