Chelsea ka mbërritur në Baku të Azerbajxhanit, ku sonte në mbrëmje do të luajë ndeshjen finale të Europa League përballë skuadrës tjetër londineze, Arsenalit.
Blutë e Londrës janë sistemuar në një hotel luksoz të kryeqytetit azer, ndërsa mbrëmjen e djeshme zhvilluan edhe një seancë stërvitore në stadiumin ku do të luhet finalja.
Megjithatë situata në kampin “blu” nuk duket aspak e qetë, pasi gjatë stërvitjes ka pasur tension mes trajnerit Maurizio Sarri dhe mbrojtësit brazilian David Luiz.
Sipas mediave italiane, stërvitja ka nisur me nxehjen e zakonshme, ndërsa më pas gjatë disa ushtrimeve, David Luiz ka qenë duke dialoguar me Gonzalo Higuain, gjë që nuk i ka pëlqyer Sarrit dhe ia ka vënë në dukje brazilianit.
Më pas mes të dyve ka pasur shkëmbim fjalësh dhe nga debati trajneri Sarri është larguar i nervozuar, duke hedhur lart kapelën e tij dhe duke e gjuajtur disa herë me këmbë, si mënyrë për të shfryrë ndaj situatës.
Sot do të jetë një nga ndeshjet më të rëndësishme të Sarrit, pasi përveçse synon të fitojë trofeun e parë në karrierë, kërkon ta bëjë këtë që në vitin e parë në stolin e Chelseat.