UEFA i ka dalë në mbrojtje gjyqtarëve të ndeshjes Tottenham – Ajax, pasi ata u kritikuan për mënyrën se si e trajtuan Jan Vertonghenin për dëmtimin që pësoi në kokë.
Mbrojtësi i Tottenhamit mbeti i gjakosur pas një dueli ajror me bashkëlojtarin e tij, Toby Alderweireld dhe portierin e Ajaxit, Andre Onana, gjatë ndeshjes të së martës në gjysmëfinale të Ligës së Kampionëve, të cilin holandezët e fituan 0-1.
Vertonghen mori trajtim të gjatë nga stafi mjekësor dhe pastaj tentoi ta vazhdonte lojën, pasi mjekët i kishin thënë që ishte në gjendje të mirë.
Por, ai u detyrua të largohet nga fusha vetëm disa momente më vonë, pasi nuk mund të mbahej në këmbë.
Incidenti i së martës e nxiti edhe një herë debatin për mënyrën se si trajtohet lojtarët pas dëmtimeve të kokës, pasi këtë sezon incidente të ngjashme u ndodhën edhe Fabian Scharit, David Ospinas dhe Anthony Lopesit.
Megjithatë, UEFA beson se gjyqtari i ndeshjes dhe stafi mjekësor morën vendimin e duhur, duke e lejuar belgun të kthehet në fushë, duke thënë se vendimi përfundimtar duhej të ishte marrë nga Tottenhami.
“Bazuar në raportet e gjyqtarëve të UEFA-s për atë ndeshje, procedura e rregullt u respektua gjatë ndeshjes, pasi gjyqtari e ndali ndeshjen menjëherë pas incidentit”, shkruhet në deklaratën e lëshuar nga UEFA.
“Mjeku nuk ishte në asnjë pikë nën presion të kohës nga gjyqtari dhe atij iu ofrua koha e nevojshme për ta dhënë vlerësimin. Ndalja e lojës ishte më e gjatë sesa 3 minutat e përmendura në procedurën e rregullt.
Në pajtim me procedurën e rregullt, para se ta lejonte lojtarin të kthehet në fushë, gjyqtari shkoi te mjeku i skuadrës, i cili e informoi gjyqtarin se lojtari është në gjendje të mirë për ta vazhduar lojën”, shkruhet në deklaratën e UEFA-s.
