Feronikeli ka marrë një rezultat historik në Ligën e Kampioneve, duke u bërë skuadra e parë kosovare që merr një barazim jashtë fushe në turin e parë të Ligës së Kampioneve. Ekipi i drejtuar nga Zekeria Ramadani ia ka dalë pas një përballje që do të kujtohet gjatë, ku deri në minutën e 88 po mundej 2-0 nga TNS por e mbylli ndeshjen me shifrat 2-2.
Feronikeli u mundua të reagonte por dukej sikur nuk kishte forca për të shqetësuar ekipin uellsian. Nga ana tjetër, një gafë e portierit Troshupa solli edhe golin e dytë për ekipin e TNS, por njëkohësisht zgjoi kampionët e Kosovës. Këta të fundit zhvendosën komplet lojën në gjysmëfushën kundërshtare dhe hap pas hapi ia dolën të gjenin hapësirat duke shkurtuar diferencën në minutën e 89 pas një aksioni model të finalizuar nga Zeka.
Dukej e mbaruar, por në fund kishte përsëri dramë pasi Feronikeli fitoi penallti në shtesë, të cilën Fazliu e transformoi saktësisht duke marrë barazimin 2-2 që i jep një shtysë të madhe për vazhdimin e mëtejshëm në turne ekipit kosovar që luan si pritës javën e ardhshme.
