Futbollisti i Kombëtares së Shqipërisë, Emanuele Ndoj, kishte nisur përgatitjet me Brescian, teksa këtë sezon do të jetë pjesë e elitës së futbollit italian.
Por, mesfushori nuk ka pasur fatin nga ana e tij, teksa ka pësuar një dëmtim në kyçin e këmbës, ndërsa është detyruar të largohet nga grumbullimi i skuadrës.
Edhe pse ende nuk është qartësuar koha e nevojshme që 22-vjeçarit do t’i nevojitet për t’u rikthyer, Ndoj me shumë mundësi do të humbasë javët e para të kampionatit.
Duke qenë se në sezonin e kaluar, Ndoj ishte nga më të mirët në radhët e Brescias, drejtuesit e kishin menduar si një lojtar formacioni edhe në Serinë A.
Por, dëmtimi ka ndryshuar planet, teksa tashmë klubi do të ndërhyjë në merkato për të gjetur zëvendësuesin e shqiptarit.
Në vëmendje është lojtari franko-maroken i Nancy, Amin Basi. Megjithatë, pavarësisht dëmtimit, mesfushori do të ketë kohën e duhur për të treguar edhe njëherë cilësitë e tij dhe për të rifituar pozicionin e titullarit.