Reali i Madridit u turpërua me rezultatin e thellë 7 – 3, në ndeshjen e zhvilluar ndaj skuadrës tjetër të qytetit, Atletico.
Por trajneri i Real Madrid, Zinedine Zidane u mundua të minimizonte peshën e disfatës duke gjetur një justifikim absurd, ai u shpreh se ishte një miqësore për skuadrën e tij, por jo për kundërshtarët.
“Sot ishte një miqësore, por jo për Atleticon’.
E menjëhershme ka qenë dhe përgjigja e trajnerit të Atleticos, Diego Simeone. Ai nuk preferoi të polemizonte por një batutë e kishte rezervuar për kolegun e tij.
“Ndeshja ishte përgatitur shumë mirë, sepse ishte një derbi dhe nuk ka mundësi që të mos e përgatitësh mirë një ndeshje të tillë. Miqësore apo zyrtare, derbi mbetet derbi, pyesni tifozët”.
Gjithsesi, Simeone është i bindur që diferencat nuk janë aq të mëdha: “Kjo ndeshje nuk pasqyron realitetin e potencialit që ka Reali. E vërteta është që talenti duhet të shoqërohet me punë. Sot çdo ekip i madh ka 3-4 lojtarë me shumë talent, por fitoren e merr ai që arrin të ndërthurë talentin me punën si kolektiv”.
